Actualidade

Fran Cajoto explica que “as veciñas e veciños de Foz cos seus impostos teñen que cubrir o que a conselleira se nega a pagar"

O alcalde de Foz, Fran Cajoto, xunto á concelleira de Asuntos Sociais, Ana Rojo, mantivo unha reunión en Santiago co presidente da Federación Galega de Municipios e Provincias (FEGAMP) e alcalde de Vilagarcía, Alberto Varela. Durante este encontro, expuxeron a problemática relacionada co "bloqueo" por parte da Xunta de Galicia e do señor Castiñeira respecto á residencia e centro de día de Foz.

Cajoto destacou a atención recibida e mencionou a débeda acumulada que a consellería ten co Concello de Foz, que ascende a máis de 700 mil euros só neste ano, engadindo que a conselleira de Política Social non responde ás solicitudes de reunión. Fran Cajoto explica que “as veciñas e veciños de Foz cos seus impostos teñen que cubrir o que a conselleira se nega a pagar e o señor Castiñeira continúa coa súa política de bloqueo e lavado de cara da Xunta, pero non pode esconder a mochila. Vamos seguir demandando unha reunión porque temos dereito e porque a Xunta de Galicia incumpre incluso o convenio asinado xa que aínda non transferiu a propiedade do edificio da residencia. A estas alturas parece probado que o único xeito de reunirse coa señora conselleira é afiliarse ao Partido Popular”.

Ademais, criticou a falta de acción por parte da Xunta en relación á transferencia da propiedade do edificio da residencia e resaltou a súa intención de seguir demandando unha reunión. O presidente da FEGAMP comprometeuse a solicitar que a conselleira Fabiola García atenda a solicitude do Concello e reciba aos seus representantes. Este encontro subliña a preocupación dos gobernantes locais sobre a xestión dos servizos sociais e a colaboración entre as administracións, especialmente nun momento crítico para a atención a persoas maiores en Galicia.