Nordés do Vicedo prepara a segunda parte dos Petiscos do Camiño dos Arrieiros
Nordés do Vicedo prepara a segunda parte dos Petiscos do Camiño dos Arrieiros, actividade organizada por Nordés co obxectivo de dar a coñecer algúns dos puntos de interese desa ruta ancestral que comunicaba o porto de Vares con As Pontes, e que servía de eixo relacional e comercial ata que se abriron novos camiños e estradas e os medios de transporte foron evolucionando, levando a esta verea ata case a súa desaparición.
De novo contarán con varias persoas expertas en distintos campos que teñen relación co patrimonio etnográfico, cultural, artístico-histórico e natural que se pode atopar ao longo do camiño e ás suas beiras, para seguir adiante neste proceso de recuperación que vai tomando forma pouco a pouco, e que esperamos dé os seus froitos a curto-medio prazo de tal xeito que o Camiño dos Arrieiros volte a ter nova vida, axudando así a que a bisbarra recupere alento con este proxecto de desenvolvemento longo tempo desexado.
O punto de quedada o sábado 1 de agosto é a rectoral de San Mamede das Grañas do Sor ás 09.20 horas. A xornada é de balde para as persoas asociadas a Nordés, mais terá un custe de 2 euros para aquelas que non o son. A cantidade recadada nesta actividade máis 50 euros da asociación, serán doados, neste caso, ao Banco de Alimentos de Lugo.
A asistencia está limitada a 25 persoas que terán que empregar os seus vehículos particulares para desprazarse. Ademáis, quen decida anotarse debe seguir as medidas de seguridade e hixiene establecidas polas autoridades sanitarias para a prevención da COVID-19: empregar mascarilla, manter as distancias de seguridade interpersoal, etc.
Para anotarse haberá que mandar un e-mail a asociacion.nordes@gmail.com ou chama ao 653 756 454.