Mondoñedo vivirá con intensidade as festas na honra da Nosa Señora dos Remedios
A cidade de Mondoñedo xa ultima os preparativos para celebrar as súas festas patronais en honra da Nosa Señora dos Remedios, unha cita que se prolongará desde o venres 12 ata o luns 15 de setembro. O programa mestura tradición relixiosa cunha ampla oferta cultural, musical, deportiva e lúdica, pensada para todos os públicos.
No plano relixioso, a Novena dos Remedios, a Misa de Ofrenda, a solemne procesión do domingo e a Misa de Cofrades do luns constitúen os momentos máis sinalados dun calendario que conserva a esencia devocional destas festas.
No apartado musical, a programación traerá actuacións tan variadas como a Mekanika Rolling Band (venres), a orquestra Principal e o concerto de Natalia, participante da primeira edición de Operación Triunfo (sábado), a verbena co Combo Dominicano (domingo) ou a música de D-Kris na sesión vermú do luns. Non faltarán as orquestras “Zafiro” e “Nueva Fuerza”, as tradicionais sesións de vermú e a popular Xuntanza de Cantos de Taberna, que encherá as rúas de ambiente festivo.
Os máis pequenos tamén terán un protagonismo especial, cun espectáculo de Micromina Teatro (sábado), a celebración do Día do Neno (luns) e a romaría das XVIII Xornadas do Peregrino “Abrindo Camiño”, con xogos tradicionais, degustación gastronómica e música popular.
O deporte tamén se suma á festa cun encontro destacado: o X Memorial Ramón Espantoso, que enfrontará ao Mondoñedo F.C. e La Caridad F.C. o domingo 14 no campo municipal Viñas da Veiga.
O programa complétase con propostas culturais, entre as que salientan a inauguración da rúa Andrea López Chao e a presentación do documental Andrea López Chao, o legado dunha mestra galega en Cuba, actos que terán lugar o luns dentro das xornadas do peregrino.