Mondoñedo organiza unha formación sobre o coidado de persoas dependentes
O Concello de Mondoñedo, a través dos Servizos Sociais e en cooperación coa Asociación de Familiares de Enfermos de Alzheimer e outras demencias neurodexenerativas de Lugo (Afalu), pon en marcha unha formación centrada no coidado de persoas dependentes.
A actividade desenvolverase no Pazo de Santomé os días 17 e 18 de setembro, a partir das 18:00 horas, cunha duración total de cinco horas. Trátase dunha iniciativa gratuíta e aberta ao público xeral que busca proporcionar ferramentas prácticas e coñecementos básicos a quen convive ou traballa con persoas en situación de dependencia.
O programa inclúe contidos como a atención integral á diversidade funcional, pautas de coidado e estimulación, o uso de produtos de apoio ou técnicas de intervención psicolóxica.
As persoas interesadas poden inscribirse a través dos Servizos Sociais do Concello de Mondoñedo ou no teléfono 982 524 003, extensión 8.