Mondoñedo mellorará a accesibilidade na zona de Os Castros
O barrio de Os Castros, en Mondoñedo, experimentará nas vindeiras semanas unha importante transformación grazas ao impulso conxunto da Xunta de Galicia e do Concello. Ambas administracións veñen de acordar a sinatura dun convenio para acometer obras de mellora da accesibilidade e posta en valor desta zona da cidade, cun investimento total que supera os 314.000 euros.
A intervención forma parte do programa Hurbe da Consellería de Vivenda e Planificación de Infraestruturas, que achegará o 70 % do orzamento, o que se traduce nunha contía de 220.262 euros. A Xunta non só financiará a maior parte da actuación, senón que tamén asumirá a licitación e execución das obras.
O Concello de Mondoñedo, pola súa banda, cubrirá o 30 % restante, cunha achega de 94.398 euros. Ademais, será o encargado de redactar o proxecto técnico e de realizar todos os trámites administrativos necesarios para a súa posta en marcha.
O plan contempla a mellora do acceso a Os Castros desde a rúa Rocha de Vélez, habilitando un percorrido de sentido único que permita a circulación tanto de vehículos como de peóns con maior seguridade. Trátase dunha reordenación integral do espazo público que busca facilitar a mobilidade e ofrecer un contorno máis amable para a veciñanza.
A actuación incluirá tamén a reparación dos muros parcialmente derrubados na contorna da antiga N-634, que serán realineados para garantir a estabilidade e mellorar a estética da zona. Deste xeito, preténdese recuperar un espazo urbano de gran valor patrimonial e social, que levaba anos precisando unha intervención decidida.
