Mondoñedo homenaxea a Cunqueiro cun acto literario e unha ruta virtual polos seus espazos

A Casa Museo acollerá o 17 de maio unha presentación da obra editada en castelán por Ediciones 98 e un percorrido dixital pola Mondoñedo cunqueiriana

O Concello de Mondoñedo, en colaboración coa Casa Museo de Álvaro Cunqueiro e a editorial Ediciones 98, organiza este 17 de maio, Día das Letras Galegas, unha actividade para profundar na figura e obra do escritor mindoniense. O evento contará coa presenza do editor Jesús Blázquez, quen presentará a colección de títulos do autor traducidos ao castelán publicados pola súa editorial, así como un novo espazo virtual dedicado ao universo literario de Cunqueiro.

O encontro celebrarase na Casa Museo, con acceso libre para o público, e contará tamén coa participación do alcalde, Manuel Otero, e de Aurora Moirón, curmá do escritor, que conviviu con el durante os anos en que redactou Merlín e familia precisamente na casa que agora acolle o museo.

Entre os libros que se darán a coñecer están Merlín y familia, Gente de aquí y acullá, Las crónicas del sochantre, Escuela de curanderos, Fábula de varia gente, Los otros feriantes e o volume inédito que viu a luz o pasado ano, La taberna de Galiana. Todos forman parte da colección “Biblioteca Álvaro Cunqueiro” de Ediciones 98.

A actividade non só repasará o legado literario de Cunqueiro, senón que tamén permitirá coñecer anécdotas e detalles biográficos da súa man máis próxima, a súa curmá, ofrecendo así unha perspectiva íntima do autor.

Ademais, presentarase a nova Ruta Literaria Virtual Álvaro Cunqueiro en Mondoñedo, accesible a través da web da editorial (www.ediciones98.com/ruta-cunqueiro-mondonedo). Esta proposta interactiva permite ao visitante descubrir os lugares emblemáticos da cidade vinculados ao escritor, a través dun mapa dixital con fotografías, vídeos curtos e textos explicativos asinados por Jesús Blázquez.

Tanto desde o Concello como desde Ediciones 98 animan a todas as persoas amantes da literatura galega a asistir a este acto de lembranza e celebración. “Será unha nova oportunidade para achegarse á obra e á humanidade dun dos grandes nomes das nosas letras”, sinalan os organizadores.