Mondoñedo estará presente en MercaJuguete da man dos coleccionistas de Dragon Ball
O presidente da Asociación Española de Coleccionistas de Dragon Ball (ASESCODB), José Pablo Hernández, veciño asentado en Mondoñedo, confirmou a participación da entidade no evento MercaJuguete, que se celebrará no Centro Comercial Plaza Éboli, no concello madrileño de Pinto.
A asociación acudirá cun expositor que recollerá unha pequena mostra representativa da evolución da coñecida franquía xaponesa. A intención, segundo explicou Hernández, é “amosar unha viaxe pola historia de Dragon Ball a través de pezas moi especiais”, cunha selección duns artigos singulares.
Entre os obxectos destacados figura un celuloide orixinal empregado na animación da serie nos anos noventa, unha peza especialmente valorada polos coleccionistas. Tamén formarán parte da exposición o primeiro cómic da coñecida como serie branca, as populares figuras distribuídas nas bolsas de patacas Matutano durante aquela década e os míticos tazos que marcaron a infancia de toda unha xeración. A colección completarase con algunha figura xaponesa adquirida directamente no país de orixe e outras pezas curiosas que forman parte do arquivo persoal do presidente da asociación.
Ademais da mostra expositiva, ASESCODB organizará actividades participativas para dinamizar o evento. Está previsto realizar un trivial para aquelas persoas que desexen poñer a proba os seus coñecementos sobre o universo creado por Akira Toriyama, con pequenos agasallos para quen resulte gañador. A xornada culminará cun sorteo final entre as persoas que sigan á asociación na súa conta de Instagram, reforzando así o contacto coa comunidade afeccionada.
Con esta iniciativa, a entidade continúa ampliando a súa presenza en encontros especializados e reforza a súa aposta pola divulgación e posta en valor do coleccionismo vinculado a unha das sagas máis influentes da cultura popular contemporánea.