Mondoñedo dedica unha rúa a Andrea López Chao, mestra e pioneira na defensa das mulleres

O Concello de Mondoñedo acordou render unha nova homenaxe á mestra Andrea López Chao, dando o seu nome á rúa que conecta a estación de autobuses coa avenida de Bos Aires. O espazo atópase moi próximo á zona de Casas Novas, lugar no que se atopa a súa casa natal.
A inauguración oficial está prevista para o luns 15 de setembro ás 19.00 horas, data que coincide coa festividade local en honra da Virxe dos Remedios.
Andrea López Chao, natural de Mondoñedo, destacou polo seu labor pioneiro a comezos do século pasado en Cuba, onde desenvolveu un intenso traballo na defensa do dereito á saúde e á educación das mulleres. A súa figura permanece como símbolo de compromiso social e pedagóxico, e o concello mindoniense quere manter viva a súa memoria con este recoñecemento público.