Mondoñedo avanza na recuperación da Ponte do Arco con obras de mellora no seu piar danado
As obras de mellora na Ponte do Arco, situada na parroquia mindoniense de Masma, avanzan a bo ritmo coa intervención impulsada pola Consellería do Medio Rural. A directora xeral da Axencia Galega de Desenvolvemento Rural, Paz Rodríguez, visitou estes días a zona para supervisar uns traballos aos que se destinan máis de 48.000 euros e que teñen como meta recuperar a funcionalidade desta infraestrutura histórica para o tráfico rodado.
A actuación céntrase na restauración do piar máis afectado polo paso do tempo e pola acción da auga. Para iso, estase a canalizar o río co fin de illar a base deteriorada e permitir a súa recuperación en condicións de seguridade. A reconstrución realizarase de maneira manual, empregando pedra natural e materiais que respecten tanto as características orixinais como a estética do contorno, garantindo unha integración coherente co patrimonio que representa esta ponte.
Este proxecto integra a aposta da Axencia Galega de Desenvolvemento Rural pola conservación das infraestruturas tradicionais presentes no medio rural galego. Trátase dun programa que busca poñer en valor elementos arquitectónicos de alto interese cultural, ao tempo que se aseguran a súa estabilidade e utilidade actual.
A Consellería do Medio Rural salientou que esta colaboración cos concellos é continua e extensiva a outras iniciativas. Mostra diso é o Plan Camiña Rural, para o que se reservarán 17,7 millóns de euros no próximo exercicio. O seu propósito é apoiar aos municipios en tarefas de ampliación, mellora e mantemento das vías municipais, reforzando así a conectividade e a seguridade viaria en contornas rurais como a de Mondoñedo.