Mondoñedo acollerá a segunda sesión dos encontros Xacobeo peregrinas
![xacobeo peregrinas mondonedo 1](https://amarinaxa.com/wp-content/uploads/2021/04/xacobeo-peregrinas-mondonedo-1.jpg)
O Centro de Interpretación do Camiño do Norte en Mondoñedo acollerá a segunda sesión do ciclo de encontros Xacobeo Peregrinas, enmarcado na programación do Xacobeo 2021-2022, e que contará coa participación da actriz e humorista Sara Escudero, a poeta Yolanda Castaño e a regatista olímpica Ángela Pumariega. Será o sábado 24 de abril de 2021 ás 17.00 horas.
Xacobeo Peregrinas é un perfecto exemplo do que está sendo a programación do Xacobeo 21-22: unha iniciativa descentralizadora, aberta e integradora, na que estamos a aproveitar as novas tecnoloxías para achegar novas perspectivas e experiencias arredor do Camiño de Santiago a un maior público”, explicou Nava Castro, directora de Turismo de Galicia.
Ciclo polos intinerarios do Camiño
O ciclo Xacobeo Peregrinas comezou o mes pasado cun primeiro encontro en Santiago de Compostela, co obxectivo de xerar espazos de reflexión que fomenten o intercambio de experiencias arredor da peregrinación e o Camiño de Santiago coa muller como protagonista.
Mondoñedo foi o lugar elixido para este segundo encontro, polo seu peso histórico e cultural, e o seu papel no Camiño do Norte, un dos itinerarios do Camiño de Santiago que atravesan a provincia de Lugo, xunto co Camiño Francés, o Camiño Primitivo e o de Inverno, e que máis medrou en peregrinos nos últimos anos.
A nova sesión do ciclo estará conducida pola presentadora, actriz e directora galega, Cristina Maró, e será retransmitida vía streaming a través da web do Camiño de Santiago.
O novo encontro contará coa participación de Sara Escudero, actriz e humorista namorada do Camiño de Santiago, que fixo ata en catro ocasións acompañada das súas cadelas; Yolanda Castaño, poeta, xestora cultural e o rostro máis popular e internacional da poesía galega; e a regatista olímpica asturiana Ángela Pumariega, que abordará a súa participación desde a óptica da muller, deporte, liderado e inclusión.