Mondoñedo acolle unha charla sobre osteoporose desde a xinecoloxía
O próximo venres 14 de marzo, ás 20:00 horas, terá lugar na Casa da Xuventude de Mondoñedo a segunda edición da charla anual "Muller & Saúde", organizada pola Asociación Sendeiriña de Mondoñedo. Neste encontro, Ezequiel Cardoso, xinecólogo do Hospital Público da Mariña Lucense, ofrecerá unha conferencia sobre a osteoporose, desde a perspectiva da xinecoloxía.
Baixo o título "Osteoporose: Claves desde a Ginecoloxía", a charla abordará aspectos fundamentais sobre esta patoloxía que afecta principalmente ás mulleres, facendo especial fincapé na prevención e nas mellores estratexias de tratamento. Cardoso, cunha longa traxectoria na especialidade, explicará como a osteoporose pode ser previda e tratada desde o ámbito da xinecoloxía.
A actividade está aberta a toda a cidadanía e constitúe unha oportunidade única para adquirir coñecementos sobre a saúde ósea e a importancia de coidar o sistema esquelético. O evento conta co apoio do Concello de Mondoñedo e promete ser un éxito tanto de asistencia como de participación.