Marcos Cabada levará a creatividade do IES Vilar Ponte ata o Palacio Real
O talento e a creatividade de Marcos Cabada, alumno de 2º da ESO do IES Vilar Ponte de Viveiro, fixérono merecedor do primeiro premio na fase galega da 44ª edición do certame escolar “Que é un rei para ti?”, unha iniciativa da Fundación Institucional Española (FIES) en colaboración coa Fundación Orange.
Grazas ao seu traballo, Marcos será o representante de Galicia na audiencia co rei Felipe VI que se celebrará en Madrid, e tamén terá ocasión de visitar o Palacio Real, compartindo a experiencia con outros rapaces e rapazas premiadas noutras comunidades autónomas.
O concurso ten como finalidade achegar o alumnado á figura do monarca e ao papel da Coroa na sociedade actual, e está dirixido a estudantes de entre 8 e 13 anos de Educación Primaria e Secundaria. Este ano, a participación en Galicia foi especialmente destacada, con 1.185 traballos procedentes de 107 centros educativos, todos eles repletos de imaxinación, reflexión e expresión artística.
Durante o acto celebrado este mércores, no que se anunciou o gañador, o director xeral de Centros e Recursos Humanos da Xunta, Jesús Álvarez, estivo acompañado polo presidente da FIES, Rafael Guardans, e por Amelia Sánchez, representante institucional da Fundación Orange. Alí tamén se puideron ver os 40 traballos finalistas, nunha exposición que amosou a variedade de formatos, desde redaccións, debuxos ou esculturas ata propostas máis innovadoras como infografías, proxectos de robótica ou animacións en 3D.
A proposta de Marcos Cabada destacou pola súa visión persoal, a orixinalidade do enfoque e o coidado na presentación, segundo valorou o xurado. A súa obra non só fixo visible o seu talento, senón tamén o esforzo do profesorado e do centro educativo, que apoian a formación integral do alumnado máis alá das aulas.