Mañá comezan as xornadas de nutrición e saúde mental de Expomar
![mens sana corporre sano expomar](https://amarinaxa.com/wp-content/uploads/2022/04/mens-sana-corporre-sano-expomar.jpg)
A Fundación Expomar organiza este xoves as Xornadas de Nutrición & Saúde Mental Mens Sana in Corpore Sano, que contan coa ponencia do neurólogo Miquel Aguilar Barberá Como alimentar o noso cerebro para mantelo xove.
A Fundación Expomar organiza este xoves 28 de abril as Xornadas de Nutrición e Saúde Mental Mens Sana in Corpore Sano, que terán lugar na casa da cultura de Burela a partir das 18:30 horas.
A xornada consistirá nunha mesa redonda sobre A Saúde Mental na Mariña Lucense e a charla informativa sobre nutrición Como alimentar o noso cerebro para mantelo xove a cargo do doutor Miquel Aguilar Barberá, neurólogo de Àptima Hospital Universiatio Mutua de Terrasa.
Para este doutor e profesor catalán, "o obxectivo é acadar máis anos de vida de calidade: unha vida plena e un envellecemento saudable. Non é unha quimera alcanzar os 100 anos en boas condicións e mesmo superar o límite dos 117 anos".
Na súa conferencia explicará as 12 claves para alimentar adecuadamente o noso cerebro e o noso corpo en todos os seus aspectos: "para cumprilo necesítase unha alimentación adecuada, exercicio físico regular e gozar das pequenas cousas do día a día, evitando todo aquilo que nos prexudica".
Previamente inaugurarán as xornadas a directora xeral de Pesca, Acuicultura e Innovación Tecnolóxica da Consellería do Mar da Xunta de Galicia, Mercedes Rodríguez Moreda, e o presidente da Fundación Expomar e alcalde de Burela, Alfredo Llano.
O acceso será libre e desde a Fundación Expomar anímase a tódolos veciños da Mariña que asistan a unhas xornadas nas que se tratarán temas moi importantes para axudarnos a levar unha vida saudable.
Despois da conferencia celebrarase unha mesa redonda sobre A Saúde Mental na Mariña Lucense, que estará moderada polo nefrólogo do Hospital da Mariña Secundino Cigarrán e na que participarán representantes das principais asociacións da contorna, como a Asociación Saúde Mental A Mariña, a Fundación Eu Son ou a Asociación de Familiares de Enfermos de Alzheimer e outras Enfermidades Neurodexenerativas de Burela.
O presidente da Fundación Expomar, Alfredo Llano, destaca que "con esta actividade pretendemos promocionar o sector pesqueiro a través do consumo de peixe, e de paso fomentar unha alimentación máis saudable e poñer en valor o traballo das distintas asociacións que traballan no mundo da saúde mental aquí na Mariña".
As Xornadas de Nutrición & Saúde Mental Mens Sana in Corpore Sano están promovidas pola Fundación Expomar e financiadas polo GALP A Mariña Ortegal, contando tamén coa colaboración do Concello de Burela e das asociacións Saúde Mental A Mariña, AFAN Burela e Fundación Eu Son.