Máis de medio cento de rapaces participaron no programa “Mañás Activas” en Xove
O Concello de Xove vén de pechar unha nova edición do programa de voluntariado xuvenil “Mañás Activas”, que se desenvolveu dende o 1 de xullo ata o 29 de agosto e no que tomaron parte 55 nenos e nenas de entre 9 e 14 anos. A proposta, que se levou a cabo de luns a venres, ofreceu unha ampla variedade de actividades de lecer pensadas para fomentar a creatividade, a convivencia e os hábitos saudables.
Ao longo destes dous meses, os participantes gozaron de obradoiros de manualidades, xogos de grupo, multideporte, un taller de robótica educativa e mesmo dun campamento dixital da Fundación Cibervoluntarios. Ademais, non faltaron as saídas especiais, como a excursión ao Urban Planet de Oleiros con parada na Praia do Lago de As Pontes, unha xornada que os mozos e mozas definiron como “inolvidable”.
A programación completouse con actividades deportivas ao aire libre dirixidas por “Roq Sport” e con varias visitas á praia, converténdose nunha alternativa de ocio activa e educativa para a rapazada.
O proxecto contou coa coordinación da Oficina Municipal de Información Xuvenil (OMIX) e co traballo das monitoras Samara Martínez Cordido e Alba Rodríguez Tapia, xunto cun equipo de voluntariado integrado por Carla Míguez Méndez, Eva Dean Durán, Daniel Felipe Garnica Díaz, Ángela Cristina Blanco Laza e Eduardo Flores Escobar.
O 29 de agosto celebrouse a festa de clausura, á que asistiron o alcalde Demetrio Salgueiro Rapa e a concelleira de Deportes e Xuventude, Cristina Iglesias Guerreiro. Ambos puxeron en valor a participación da mocidade e fixeron entrega dun agasallo ás monitoras e ao voluntariado como recoñecemento ao seu compromiso e dedicación.
A iniciativa, promovida polas concellerías de Xuventude, Deportes e pola OMIX, naceu como unha oferta de conciliación e lecer durante o verán, consolidándose ano tras ano como unha das actividades máis esperadas polas familias de Xove.