Máis da metade dos galegos consume menos peixe do que recomendan os expertos
![lonxa peixe celeiro](https://amarinaxa.com/wp-content/uploads/2021/03/lonxa-peixe-celeiro.jpg)
7 de cada 10 consumidores galegos afirma que consumiría máis peixe se se tivera suprimido ou rebaixado o IVE que aplica aos produtos do mar.
Unión de Consumidores de Galicia fai público o resultado do seu estudo sobre consumo de peixe en Galicia desenvolvido no primeiro semestre de 2023 e que amosa diferenzas nos hábitos de consumo respecto dos datos obtidos no estudo de 2019.
A principal conclusión que se extrae deste estudo, é que mellora a frecuencia de consumo recomendado1(entre 3- 4 veces á semana ) pasando do 28% dos fogares en 2019 a preto do 34,50 % en 2023. Sen embargo as cifras seguen a ser moi negativas xa que logo, máis do 55% das galegas e galegos afirma non consumir peixe ou facelo só unha ou dúas veces á semana.
Mellora tamén a porcentaxe de persoas (7,7%) que aumentou a frecuencia desde unha soa vez á semana a un maior consumo. Empeoran pola súa banda os datos das persoas que afirman non consumir peixe que pasa do 1,82% ao 2,66%, así como os relativos ás persoas que consumían peixe con maior frecuencia que baixa ate o 9,72% fronte ao máis do 10,5 % de 2019.
Máis do 57% dos galegos e galegas que afirma que o principal motivo polo que non consume peixe é debido ao seu elevado prezo. Igualmente o 51% dos consumidores galegos afirma que por culpa do prezo non consumen tanto peixe como quixeran. Outros motivos argumentados teñen que ver co tempo de preparación (13%), os horarios dos establecementos de venda (11%).
En plena campaña electoral resulta interesante valorar que a decisión do executivo nacional de non aplicar unha supresión ou rebaixa do IVE no peixe ten consecuencias respecto das cifras de consumo de peixe. O 68% dos galegos e galegas afirman que a supresión ou rebaixa do IVE que se aplica ao peixe incentivaría un maior consumo.
En canto á forma de consumir peixe, o consumo en fresco é maioritario (92%), se ben as cifras de consumo en conserva (49%) e conxelado (38%) son tamén moi significativas. Salvaxe ou de cultivo? Case o 60% decántase polo consumo de peixe salvaxe fronte ao 10% que se inclina polo de cultivo. Outro 20% afirma consumilos por igual. Para Unión de Consumidores de Galicia, preocupa especialmente a cifra de persoas que afirman non saber distinguir peixe salvaxe de peixe de cultivo, un de cada dez galegos.
E fóra da casa? Un bo dato o reflicte tamén a porcentaxe de galegos e galegas que prefiren consumir peixe cando comen fóra da casa (case o 45%) fronte a menos do 13% que prefire carne. Peixe ou carne en igual medida o afirman o 38%.