Lourenzá revela as candidaturas do VII Certame de Teatro Afeccionado
O Concello de Lourenzá fixo públicos os nomes das persoas e compañías nominadas aos premios do VII Certame de Teatro Afeccionado, uns galardóns que se entregarán o sábado 13 de decembro nunha gala especial. O xurado xa seleccionou os finalistas nas diferentes categorías, recoñecendo o traballo de agrupacións teatrais chegadas de múltiples puntos da comunidade.
Candidaturas ás mellores representacións e interpretacións
Na categoría Conde Santo á mellor representación compiten tres propostas: Campanas de Bastabales, da compañía Imaxina-T (Narón); A Xuntanza, de El Ruiseñor (Culleredo); e O caso do cadáver asasinado, de Teatro do Asteleiro (Ferrol).
Para o Premio Lourenzo ao mellor actor, o xurado seleccionou a Rubén Pena (The-sastre Teatro, Barbadás), Ramón A. Ares (Ollomao, Barreiros) e Fernando Moares (El Ruiseñor, Culleredo).
Na categoría Ana á mellor actriz, as candidatas son Patricia Pérez (Ollomao, Barreiros), Xoana Rodríguez (Imaxina-T, Narón) e Diana Maroño (El Ruiseñor, Culleredo).
A lista de mellor posta en escena coincide coas producións nominadas á mellor representación: Campanas de Bastabales, A Xuntanza e O caso do cadáver asasinado.
En canto ao mellor actor de reparto, figuran Benito Pérez (Ollomao, Barreiros), Francisco Calvo (El Ruiseñor, Culleredo) e Quequé Mareque (Teatro do Asteleiro, Ferrol).
Para mellor actriz de reparto, optan ao galardón as intérpretes de O Catre Teatro (As Pontes), Nerea Acebo (Imaxina-T, Narón) e as actrices de El Ruiseñor (Culleredo).
Finalmente, o Premio Especial do Público decidirase entre tres obras moi aplaudidas: Dona Clara (Ollomao, Barreiros); Os vellos deberían de namorarse e non morrer (Coles Teatro); e O caso do cadáver asasinado (Teatro do Asteleiro, Ferrol).
A cerimonia de entrega terá lugar o sábado 13 de decembro ás 19:00 horas no Multiusos Ponte de Cuñas. Estará presentada pola actriz laurentina Carmen de Picoaga, que tamén subirá ao escenario formando parte da obra Julieta en verano, representada polas compañías Luz de Gas e El Callejón del Gato, ambas de Xixón.
O evento, organizado polo Concello de Lourenzá, conta co apoio da Deputación Provincial de Lugo, e converterá unha vez máis o municipio nun punto de encontro para o teatro afeccionado galego e asturiano.