Lourenzá quenta motores para un Domingo de Piñata cheo de cor e premios
O Concello de Lourenzá está a ultimar os detalles dunha das datas máis destacadas do seu calendario festivo: o Domingo de Piñata, que se celebrará o vindeiro 22 de febreiro. A xornada promete encher as rúas de cor, música e imaxinación, consolidando esta cita como un dos momentos máis esperados do Entroido na comarca.
O desfile dará comezo ás 16.30 horas e contará coa participación de comparsas, grupos e persoas a título individual que amosarán as súas propostas cheas de fantasía e creatividade. A animación correrá a cargo de Puzzle Animación, que dinamizará o percorrido con espectáculo e ambientación para todos os públicos.
A organización destinará máis de 5.000 euros en premios, co propósito de recoñecer o traballo, a posta en escena e a orixinalidade das creacións participantes. Un incentivo que cada ano contribúe a elevar o nivel e a implicación das agrupacións.
As persoas interesadas en participar poderán formalizar a súa inscrición na Biblioteca Municipal de luns a venres, en horario de 17.00 a 20.00 horas. Ademais, habilitarase un prazo extraordinario o propio día da celebración no Recinto Feiral, entre as 12.00 e as 15.00 horas.
Desde o Concello sinalan que nos próximos días se publicarán na páxina web municipal as bases completas da convocatoria, co fin de facilitar todos os detalles organizativos. Con esta iniciativa, Lourenzá reafirma o seu compromiso coa dinamización cultural e coa conservación das tradicións, apostando por unha festa aberta, participativa e pensada para todas as idades.