Laxamoura, en Xove, consolídase como referente en aproveitamento sostible do territorio
O aproveitamento sostible do territorio ten en Laxamoura, no concello lucense de Xove, un dos seus exemplos máis claros. Así o puxo de manifesto a conselleira do Medio Rural, María José Gómez, durante a visita realizada esta mañá ao pastizal promovido nos montes veciñais en man común desta parroquia, unha actuación que foi destacada como modelo de xestión responsable e equilibrada do medio rural.
A titular de Medio Rural subliñou que este sistema permite compatibilizar o uso produtivo do monte coa conservación do patrimonio natural, converténdose ademais nunha eficaz barreira fronte aos incendios forestais. Segundo explicou, a presenza de pastos favorece a redución da biomasa combustible, ao tempo que crea oportunidades para a gandería en extensivo, unha actividade clave para a fixación de poboación no rural.
O proxecto desenvolvido en Laxamoura abrangue unha superficie de 55,67 hectáreas e contou cun investimento próximo aos 90.000 euros. Grazas a este orzamento realizáronse traballos de desbroce, tanto de maneira mecanizada como manual, fundamentais para a posta en valor destes terreos. A conselleira lembrou tamén que esta actuación dá continuidade a outras intervencións previas na zona, como a renovación dos peches perimetrais ou a reparación das mangas de manexo do gando.
Durante a súa visita, María José Gómez incidiu na necesidade de contar cunha Política Agraria Común sólida e con fondos suficientes que permitan impulsar iniciativas deste tipo, fundamentais para construír un medio rural vivo, produtivo e sostible. Neste contexto, reafirmou o compromiso da Xunta de Galicia de seguir apoiando este tipo de proxectos a través do Plan de Pastos de Galicia.
Este plan, en marcha desde o ano 2020, permitiu a mobilización de preto de 2.500 hectáreas distribuídas en 106 pastizais por toda a comunidade, cun investimento global que rolda os 15 millóns de euros. Unha liña de traballo que, segundo avanzou a conselleira, terá continuidade en colaboración cos propietarios dos montes, co obxectivo de garantir un rural máis protexido, produtivo e con futuro.