José, veciño de A Rigueira, celebra o seu século de vida rodeado de agarimo
O pasado mércores 7 de maio, José, veciño da aldea de Labradela, na parroquia de A Rigueira (Xove), cumpriu 100 anos. Un fito vital que a súa familia quixo celebrar por todo o alto este domingo, cunha xornada de encontro e lembranzas chea de emoción e afecto.
A celebración incluíu unha comida familiar na que José estivo arroupado polos seus seres queridos, e tamén contou cun xesto institucional moi especial: a visita do alcalde de Xove, Demetrio Salgueiro, e da concelleira de Servizos Sociais, Tamara Soto, que se desprazaron ata o lugar para felicitalo persoalmente e lle trasladar o recoñecemento do Concello.
“Un século de vida é un legado inmenso de historias, traballo e sabedoría compartida. É unha honra poder renderlle esta pequena homenaxe”, sinalaron as autoridades locais durante a visita. O propio José, emocionado, agradeceu o cariño recibido nun día que describiu como “inesquecible”.
A súa longa vida, ligada á terra e ás tradicións da Mariña, é testemuña dun tempo e dunha forma de vivir que moitas veces se perde, e que hoxe máis que nunca cómpre poñer en valor. O Concello de Xove quixo así expresar tamén o seu respecto e admiración por todas as persoas maiores do municipio, verdadeiros piares da comunidade.