Isidro Rodríguez, “O Core”, dará o pregón das festas do Conde Santo en Vilanova de Lourenzá
Vilanova de Lourenzá prepárase para vivir unhas intensas festas do Conde Santo que se prolongarán desde este xoves, 28 de agosto, ata o luns 1 de setembro. O acto central da xornada inaugural será o pregón a cargo de Isidro Rodríguez Loredo, coñecido popularmente como “O Core”, que terá lugar ás 20:30 horas no Multiusos Ponte de Cuñas, tras a representación teatral Punto en boca: entre fíos anda o lío, de Raquel Crespo, programada para as 19:00 horas.
O pregón, segundo avanzou a organización, pretende ser un punto de encontro para veciños e visitantes, combinando humor, anécdotas locais e a tradición das festas, “unha maneira de poñer a comunidade no centro das celebracións”, sinalou O Core.
As actividades continuarán durante todo o fin de semana con propostas para todas as idades. O venres 29 está programado o Día da Bicicleta desde as 17:00 horas, e pola noite celebrarase a cea-baile Lenda do Conde no mosteiro de San Salvador, coa actuación gratuíta do grupo tributo a Joaquín Sabina, La Penúltima Sabinera, ás 23:30 horas.
O sábado 30 e o domingo 31 haberá unha ampla programación que inclúe saídas dos Cocos, cabezudos, misas solemnes, sesións vermú, mostras folclóricas e torneos de fútbol entre equipos locais. O luns 1 de setembro pecharase a programación coa saída dos Cocos ás 12:00 horas e a sesión vermú co dúo Epo-k ás 14:00 horas.
As festas están organizadas pola asociación Conde Santo, coa colaboración do Concello de Lourenzá e da Xunta de Galicia, e teñen como obxectivo ofrecer á veciñanza unha semana de lecer, cultura e tradicións locais.