Inician novas obras de canalización no Porto de Burela con importantes restricións de tráfico
A primeira hora da mañá deste martes, 5 de agosto, comezaron os traballos dun novo tramo da obra de canalización no Porto de Burela, o que implicará restricións de tráfico significativas na rúa do Berbés durante aproximadamente tres meses, segundo informou a Policía Local.
Entre as primeiras medidas aplicadas figura o corte da glorieta situada preto da entrada da lonxa, que quedará pechada ao tráfico durante unhas dúas semanas. Para permitir a saída dos camións desde a lonxa, habilitarase un xiro na explanada contigua, de maneira que poidan continuar cara á variante sen necesidade de pasar pola glorieta.
A circulación en sentido Foz quedará prohibida pola rúa do Berbés, e a vía irá cortándose progresivamente segundo avance a escavación. En calquera caso, non se poderá saír cara Foz desde o Porto durante o tempo que duren os traballos.
Con todo, manterase o acceso tanto á lonxa como á zona portuaria e ao casco urbano de Burela a través da glorieta situada na avenida do Perdouro (zona do Eroski), sen que se vexa afectado ese punto de entrada.
Desde a Policía Local aclaran que todo este treito se atopa en zona portuaria, polo que non é da súa competencia directa, pero decidiron trasladar esta información en coordinación coa empresa adxudicataria da obra, como medida de colaboración.
A veciñanza e condutores están chamados a extremar a precaución e prestar atención á sinalización provisional, que se irá adaptando ao ritmo das intervencións.