Incorpórase á subdelegada do Goberno a nova secretaria xeral da Subdelegación, Elvira Fernández
A subdelegada do Goberno en Lugo, Olimpia López, deu a benvida á nova secretaria xeral da Subdelegación do Goberno, Elvira Paloma Fernández Domínguez, quen se incorpora ao cargo tras desempeñar responsabilidades directivas no ámbito das Institucións Penitenciarias.
López destacou a “ampla experiencia e capacidade de xestión” da nova secretaria xeral e amosou confianza en que a súa incorporación contribuirá a seguir reforzando o funcionamento da Administración Xeral do Estado na provincia, garantindo un servizo público eficaz e próximo á cidadanía.
Fernández Domínguez pertence ao Corpo Superior de Técnicos de Institucións Penitenciarias e exercía ata o de agora como subdirectora de Tratamento no Centro Penitenciario de Monterroso, posto que ocupa desde 2007. Ao longo desta etapa coordinou programas de intervención, supervisou equipos de traballo e impulsou iniciativas orientadas á formación e á inserción laboral das persoas internas, ademais de manter a colaboración con entidades sociais e presidir a Asociación Penitenciaria Concepción Arenal.
Licenciada en Dereito pola Universidade Complutense de Madrid, conta tamén con dous mestrados, en Ciencias Penais, Penitenciarias e Criminolóxicas e en Perfilación Criminal, unha formación que completa cunha participación constante en cursos especializados e proxectos profesionais.
Na súa traxectoria figura tamén a participación en programas europeos relacionados coa integración de persoas refuxiadas e coa cooperación xurídica internacional, así como o desenvolvemento de labores docentes en accións formativas dirixidas a profesionais do ámbito penitenciario.
A subdelegada puxo en valor o perfil técnico e a experiencia de Fernández Domínguez na dirección e organización de servizos, salientando que “a súa visión e coñecemento serán clave para continuar avanzando nunha administración moderna, coordinada e ao servizo da cidadanía”.