A subdelegada do Goberno en Lugo, Isabel Rodríguez, subliñou a relevancia da divulgación de contidos feministas e da educación en igualdade como principais ferramentas para combater os comportamentos sexistas, especialmente entre a xuventude. Rodríguez realizou estas declaracións durante a presentación da exposición ‘Dáte Conta’, que se poderá visitar na biblioteca municipal de Viveiro. No acto estivo acompañada pola alcaldesa, María Loureiro, a xefa da Unidade contra a Violencia sobre a Muller, María Luisa Castro, e membros da corporación municipal.
Durante a súa intervención, Isabel Rodríguez destacou que “a adolescencia e a xuventude son franxas de idade que nos están a deixar cifras alarmantes ás que temos a obriga de responder”. Engadiu que “mudar esta realidade é unha tarefa compartida por todos e todas, non só das institucións, senón tamén da sociedade en xeral, incluindo a educación, a cultura, a economía e todos os eidos”.
A alcaldesa de Viveiro, María Loureiro, compartiu esta visión e, xunto aos demais participantes no acto, desglosou os distintos paneis que compoñen a exposición. A mostra busca transmitir aos mozos e mozas mensaxes que os motiven a construír relacións sas e baseadas na igualdade.
A exposición ‘Date Conta’ aborda a violencia machista, fundamentalmente no ámbito da parella, a través de carteis informativos e viñetas que ilustran situacións e comportamentos de desvalorización, machismo, violencia psicolóxica, abuso emocional e obsesión. Estes recursos visuais buscan concienciar á mocidade sobre as diferentes formas de violencia que se poden dar nas relacións.
Ademais das viñetas, a mostra inclúe varias frases con datos alarmantes procedentes do estudo “A situación da violencia contra as mulleres na adolescencia en España”, realizado polo Ministerio de Igualdade. Entre os datos, resáltase que o 4% das adolescentes admiten ter recibido mensaxes insultantes, ameazadoras ou que lles causaron medo a través da Internet ou do móbil. Tamén se indica que unha de cada dez mozas adolescentes foi illada das súas amizades, controlada pola súa parella ou incitada a participar en actividades sexuais non desexadas.
A exposición ‘Dáte Conta’ pretende ser unha ferramenta de sensibilización para a xuventude, promovendo relacións afectivas respectuosas e igualitarias, e poñendo en evidencia as actitudes nocivas que aínda persisten nas relacións de parella entre os máis novos.
