Inauguran a sétima edición do Ribadeo de Tapeo con 26 petiscos que recollen o bo facer da súa hostalaría
Esta fin de semana deu comezo a décimo sétima edición do Ribadeo de Tapeo, un dos concursos gastronómicos con máis renome de Galicia. Ribadenses e visitantes poderán saborear ata o 28 de abril un total de 26 petiscos nos que se recolle o bo facer e creatividade da hostalería do municipio. A edición de 2024 chega con novidades como a tapa máis sostible, “aquela elaborada nun 50 % con produto local e que a organización comprobará a través da trazabilidade dos alimentos”, explicou Marta Saiz, a concelleira de Turismo e Comercio.
“Aproveito a ocasión para agradecer a colaboración de Eo Alimenta, que proporcionou asesoramento á hostalería e posibilitou unha rede de contactos entre os hostaleiros e as persoas produtoras da zona. Ademais con esta nova categoría desexamos poñer en valor a produción local e agroecolóxica apostando pola sustentabilidade nos tres eixos: o ambiental, o social e o económico”,
A maiores da tapa + sostible, no Ribadeo de Tapeo tamén haberá propostas doces, veganas, vexetarianas e sen glute. Os premios serán outorgados por un xurado profesional e tamén polo público, que poderá votar nas urnas que atopará nos locais participantes ou a través da aplicación do Ribadeo de Tapeo na que deberá rexistrarse. Para poder votar será obrigatorio ter degustado 5 tapas, para elo deberán ir selando o cartón ou para aquelas persoas que voten a través da aplicación deberán ir escaneando as tapas que degusten a través do QR que atoparán en cada local. As persoas que participen poderán acceder a moitos premios.
O alcalde, Dani Vega, e a edil Marta Saiz animan “a ribadenses, ás veciñas e veciños de toda a contorna, de Galicia e de Asturias, e os visitantes que a fin de semana se achegan a Ribadeo, a gozar do noso concurso gastronómico”. Ademais, os días 21 e 28 contarán con música en directo e este domingo no porto de Porcillán e o vindeiro domingo na rúa San Francisco, haberá sobremesas culturais.