Gastronomía e tradición danse cita na VI Festa da Enfariñada en Trabada
A VI Festa da Enfariñada xa quenta motores tras a presentación oficial do seu cartel, que tivo lugar esta tarde e marca o inicio da conta atrás para unha das celebracións gastronómicas máis esperadas da comarca. O evento, que se celebrará o domingo 4 de maio na Praza do Concello de Trabada, renderá homenaxe a un dos pratos máis tradicionais da zona: a enfariñada.
O alcalde de Trabada, Rubén García, destacou a relevancia desta festividade para a posta en valor da gastronomía e as tradicións locais. “A Festa da Enfariñada é unha oportunidade única para promover a nosa cultura culinaria e atraer visitantes ao noso concello. Estamos seguros de que esta edición volverá ser un éxito”, afirmou.
A partir das 12:00 horas do 4 de maio, os asistentes terán a oportunidade de degustar a enfariñada, un prato elaborado con ingredientes básicos como ovos, leite, auga, fariña e sal, e que en moitas zonas da contorna é coñecido como “faragullos”. Como novidade, nesta edición ofreceranse opcións sen glute, ademais de racións de xamón cocido e chourizo.
A festa contará ademais cun mercado de produtos locais de proximidade, onde os visitantes poderán adquirir delicias gastronómicas e artesanía tradicional. A xornada estará amenizada pola música tradicional dos grupos “Tumba e Dálle” e “Grupo Lume”, que porán a banda sonora a un día de festa e convivencia.
Organizada polo Concello de Trabada e coa colaboración da Deputación de Lugo, a Festa da Enfariñada segue a consolidarse ano tras ano. Na pasada edición servíronse máis de 550 racións, reforzando este evento como unha referencia no calendario festivo da provincia.
Co cartel xa desvelado, a expectación entre veciños e visitantes non deixa de medrar, cunha cita ineludible para os amantes da gastronomía e as tradicións.