Foz acollerá un seminario de náutica deportiva aberto ao público
O municipio de Foz será escenario o vindeiro 25 de abril dun seminario de náutica deportiva centrado no uso de ferramentas clave para a navegación, como a sonda, o GPS e os motores de posicionamento.
A actividade desenvolverase no CENIMA a partir das 9:30 horas e estará impartida pola empresa especializada Onnautic, que ofrecerá unha sesión formativa dirixida tanto a persoas afeccionadas como a aquelas interesadas en iniciarse neste ámbito.
O seminario ten como obxectivo achegar coñecementos prácticos sobre o manexo de equipos habituais na navegación deportiva, contribuíndo así a mellorar a seguridade e a eficiencia no mar.
A participación é totalmente gratuíta, aínda que as prazas son limitadas, polo que é necesario realizar inscrición previa. As persoas interesadas poden reservar a súa participación a través de WhatsApp ou por teléfono no número 639 282 158.
Ao remate da xornada formativa, os asistentes poderán participar nun encontro máis distendido no Club Náutico de Foz, onde se ofrecerán pinchos e viños.
A iniciativa está organizada pola Asociación A Ribeira de Foz, Kukadas Pesca e a empresa Onnautic, contando coa colaboración do Centro Comercial Aberto de Foz, o Club Náutico e o Concello de Foz.