Foz acende este venres o Nadal cun acto musical e novas propostas para todas as idades
O Concello de Foz inaugura este venres 5 de decembro a súa programación de Nadal cun acto simbólico e moi agardado: o acendido das luces festivas. A glorieta de Vilalba, onde destaca un boneco de neve de máis de seis metros de altura, será o escenario no que, ás 18.30 horas, se pulse o interruptor que dará comezo oficialmente ás celebracións. A Banda de Música e a Escola Municipal de Música porán o acompañamento musical a este arranque.
O alcalde, Fran Cajoto, adianta que este primeiro acto será só o inicio dunha axenda ampla e chea de propostas para todos os públicos. “Cando acendamos a iluminación chegará tamén un novo personaxe moi coñecido por pequenos e maiores, que visitará o Concello e ao que atoparemos polas rúas, prazas e edificios municipais”, explica.
A fin de semana continuará con máis cultura. O sábado 6, ás 19.00 horas, a Sala Bahía acollerá unha noite de góspel con Aba Taano. As entradas, a 12 euros, poden mercarse en giglon.com ou directamente na entrada da sala. Ademais, os días 5, 6 e 7 haberá un mercadiño de Nadal na Praza Conde de Fontao, organizado pola asociación Raíñas da Casa.
A concelleira de Cultura, Inés López Couto, adianta que o programa completo se fará público nos próximos días, pero avanza algunhas das citas máis destacadas: actividades infantís, concertos da Banda de Música e da Escola Municipal de Música, festivais de Nadal do Feitizo e da Subela, funcións de teatro, o concerto da Coral Polifónica de Foz xunto con Mar Aberto e Eufonía, a visita de Papá Noel, a chegada dos Bolechas e unha Cabalgata de Reis “chea de maxia”, que poñerá o broche final ás festas.
O alcalde anima a toda a cidadanía e ás persoas que se acheguen á vila a gozar do ambiente festivo. “Convidamos ás veciñas, veciños e visitantes a desfrutar dun paseo por Foz, do noso alumeado, do comercio e da hostalería nestas datas tan especiais”, sinala Cajoto.