Falece unha das oito persoas feridas en Burela nun atropelo múltiple
Unha das persoas feridas no atropelo múltiple ocorrido pola tarde, en plena celebración das festas patronais, faleceu na madrugada deste sábado. A vítima formaba parte da comunidade da Fundación Eu Son, unha entidade que traballa con persoas con discapacidade intelectual.
O sinistro, que deixou un total de oito persoas feridas, tivo lugar na zona portuaria arredor das 16:20 horas, cando un turismo conducido por un home octoxenario perdeu o control tras impactar contra unha estrutura das atraccións festivas e acabou embestindo ao grupo que se atopaba nun lateral da instalación.
Os equipos de emerxencia actuaron con rapidez, acudindo ao lugar efectivos do 061, Policía Local, Garda Civil de Tráfico e Bombeiros de Barreiros. Os feridos foron trasladados ao hospital, onde cinco deles permanecen ingresados en planta con evolución estable, mentres que outros dous xa foron dados de alta. O condutor, que deu negativo nas probas de alcol e drogas, tamén recibiu atención hospitalaria e xa foi dado de alta.
O acontecido tivo un forte impacto na comunidade. A Fundación Eu Son é un piar social en Burela, e o golpe emocional entre familiares, compañeiros e veciñanza é fondísimo. Dende o Concello convocouse con urxencia unha reunión extraordinaria coa alcaldesa Carmen López, o equipo de goberno, representantes da comisión de festas, responsables policiais e os portavoces da oposición, coa fin de analizar a situación e tomar decisións inmediatas sobre a continuidade das festas.
Nun comunicado feito público na noite do venres, o Concello expresou a súa “máxima preocupación” e manifestou que, tras unha reflexión profunda, decidiu manter a programación festiva prevista. “Non é unha decisión tomada á lixeira. Foi meditada con responsabilidade, con corazón e con sentido común”, explicou o executivo local. A continuidade das festas, apuntaron, pretende ser un equilibrio entre o respecto ao sucedido e o compromiso co tecido social e económico que vive directa ou indirectamente destas celebracións.
Finalmente, o Concello quixo transmitir o seu apoio e afecto ás familias afectadas, á Fundación Eu Son e a toda a comunidade burelá que nestes días vive entre a dor, a solidariedade e a difícil tarefa de continuar. “A nosa prioridade segue sendo estar ao lado das vítimas e dos seus seres queridos. Acompañámolos nestes momentos de tanta dor, con todo o noso cariño”, concluíu o comunicado.