Este sábado darán comezo as festas patronais de Burela
![festas patronais burela logo](https://amarinaxa.com/wp-content/uploads/2021/05/festas-patronais-burela-logo.jpg)
Burela celebrará as súas festas patronais cun formato adaptado aos tempos actuais que seguen marcados pola pandemia. Haberá pregón, animación musical polas rúas, actos relixiosos e a confección dunha alfombra floral na praza do Concello, entre outras actividades. O pregoeiro deste 2021 será Basilio Otero, presidente da Federación Nacional de Cofradías de Pescadores e presidente da confraría de Burela. A programación comezará o 29 de maio e rematará o 8 de xuño.
A presidenta da comisión organizadora das festas patronais de Burela, Toñi Eijo, anunciou que “o día 29 de maio, ás oito da tarde, temos o pregón a cargo de Basilio Otero. Elixímolo por estar na Confraría de Burela, que sempre apoiou e apoia as festas de Burela, en concreto tamén el.
É presidente da Federación Nacional de Cofradías e Patrón Maior da Confraría de Pescadores de Burela. Despois do pregón, haberá un concerto do grupo Nostálgica. O domingo, 30 de maio, de dez da mañá a unha da tarde, na praza da Mariña, teremos un rastrillo popular solidario. Ese día ás 13:00 horas, na praza do Concello, actuará a Banda de Música de Foz, coa colaboración da Banda de Gaitas da A.C.Dambara”.
Toñi Eijo relatou que “o venres, día 4, que sería o fin de semana grande das festas, ás 20:00 horas, na praza da Mariña, haberá un concerto de rock da Escola de Música de Burela. O sábado, 5 de xuño, a partir das nove na praza do Concello, haberá a confección da alfombra floral e tamén pasarrúas a cargo de Mecánika e Dambara. Ese mesmo día ás nove da noite na igrexa parroquial de Santa María de Burela, haberá unha misa. O domingo, 6 de xuño, teremos pasarrúas a cargo da Banda de Santo Inocencio; ás doce, na igrexa parroquial de Santa María de Burela haberá misa e á unha da tarde, no barco museo Reina do Carme terá lugar a interpretación da Salve Mariñeira a cargo da Banda de Santo Inocencio. O luns, 7 de xuño, ás doce horas, na igrexa parroquial de Santa María de Burela haberá unha misa e ás doce e media na praza do Concello unha actuación dos Acordeonistas da Mariña. Finalmente o martes, día 8, ás doce do mediodía no porto terá lugar a ofrenda floral marítima”.
O concelleiro de Cultura, José Díaz, contou que “nestas festas patronais diferentes evidentemente, porque partimos do feito de que, por agora, non se permite a celebración de festas nin tampouco nos parece oportuno facer algo parecido, programamos estas pequenas cousas. Unha delas é a actuación do grupo Nostálxica que estará o día do pregón, o sábado 29, a partir das oito e media aproximadamente. É un grupo que fai versións de rock de cancións moi coñecidas tanto españolas como estranxeiras. Penso que vai estar moi entretido de ver. O aforo vai estar nas 178 persoas, é moi reducido, tal cal é o noso auditorio será unha redución importante. O formato, en principio, será por orde de chegada. A partir das sete e media abriranse as portas e ata completar o aforo. Outra das actuacións musicais que temos programadas, que tamén creo que é interesante, é a da Agrupación de Rock da Escola Municipal de Música de Burela. Xa tivemos algunha actuación súa o verán pasado e o anterior. É un grupo moi activo que nos ofrecerá o seu traballo na praza dá Mariña. Imos poñer cadeiras para que a xente póidase sentar, mantendo as distancias, poñeremos tamén unha mesa con xel hidroalcohólico e por suposto será obrigatorio o uso de máscara durante a actuación”.
O edil burelés engadiu que “tamén temos a colaboración de Dambara, que agradecemos, e tamén do grupo Santo Inocencio, que farán varias intervencións por Burela con pasacalles e tamén a Salve Mariñeira o domingo no barco museo. Ademais contamos coa presenza dunha das charangas, que creo que é a máis importante de Galicia e que máis gusta, que é a charanga Mecánika. Xa a tivemos na Feira do Bonito en dúas ocasións e repiten con outra actuación o sábado, que sería o día grande das festas, acompañando ao grupo Dambara, tanto ao mediodía entre as doce e as dúas e media, como á tarde a partir das sete. Será para animar un pouco as rúas e polo menos ter ese aspecto se non festivo polo menos diferente a calquera día normal. Esperamos que estas poucas cousas que se poden facer sexan do gusto dos nosos veciños e veciñas e que o ano que vén podamos retomar as festas co seu formato habitual”.
![programa festas burela](https://amarinaxa.com/wp-content/uploads/thumbs/2021/05/programa-festas-burela-200x283.jpg)