Esixen do goberno ribadense mellor planificación da limpeza de colectores e áreas recreativas
A vicevoceira do Grupo Municipal Popular de Ribadeo e concelleira do PP delegada da área de Medio Ambiente, Elena Sierra, critica “a falta de planificación do Goberno local para o coidado de zonas verdes, a retirada de residuos e a limpeza de colectores e rúas”. Para a edil popular “é lamentable a imaxe de suciedade que levan da nosa vila os turistas que visitaron Ribadeo este verán”.
“¡Qué asco!” é unha das tantas expresións que escoitamos dos nosos veciños e visitantes en varias ocasións ao pasar preto dos colectores do lixo”, segundo explica Sierra. A este respecto, engade tamén “moitos outros comentarios de persoas que non poden abrir as ventás debido á abundancia de moscas arredor dos colectores” e “queixas dos ribadenses que non sabían onde depositar o aceite usado porque o colector estaba cheo”.
Igualmente, a popular considera que “xa non ten nome” o abandono das áreas recreativas. “Algunhas foron rozadas en agosto e outras aínda están agardando”, a pesar de que o concelleiro nacionalista de medio ambiente recibe unha dedicación exclusiva que nos costa aos ribadenses 2.400 euros mensuais “que parece que non sirve para moito e, polo tanto, supón un gasto para as arcas locais”.
Ante esta situación, dende o Grupo Municipal Popular volvemos a pedirlle ao equipo de Goberno “unha planificación seria con respecto ao coidado de xardíns e áreas recreativas, retirada de residuos, lavado de colectores e baldeo de rúas”. Sobre este último asunto, os populares trasladan tamén ao Goberno local outra queixa dos veciños e veciñas “por realizar estes labores a media mañá”.