Escape Room na Biblioteca Municipal para achegar Rosalía á infancia
Comezou na Biblioteca Municipal El Viejo Pancho un Escape Room dirixido ao alumnado de primaria dos centros educativos de Ribadeo, dentro do programa "O Concello cos coles". A iniciativa está a cargo do alumnado do obradoiro de emprego Máis Emprego e busca achegar a figura de Rosalía de Castro dun xeito lúdico e dinámico.
A concelleira de Cultura, Begoña Sanjurjo, destacou que “este é o segundo ano que se leva a cabo esta actividade, dada a excelente acollida do 2024 tanto por parte do alumnado como do persoal docente. Con esta iniciativa, achegamos a nenas e nenos a figura de Rosalía, ao tempo que dinamizamos a Biblioteca Municipal e fomentamos a lectura nas primeiras idades”.
A actividade finalizará o venres 21 de marzo, coincidindo co Día Internacional da Poesía. Ao longo destas dúas semanas, preto de 480 alumnos pasarán pola biblioteca para participar na proposta.
Desde o Concello e a Área de Cultura, Sanjurjo agradeceu a colaboración dos centros educativos e o traballo e implicación do obradoiro de emprego Máis Emprego.