Entregáronse os Premios do Certame de Poesía Infantil Nadal 2024 de Ribadeo

Durante o acto, a concelleira de Cultura animou aos rapaces e rapazas a seguir cultivando a súa afección por escribir e ler, subliñando que “canto máis lemos, máis ideas se nos ocorren”

A Biblioteca Municipal El Viejo Pancho de Ribadeo acolleu a entrega dos Premios do Certame de Poesía Infantil Nadal 2024, un evento que destacou o talento poético dos máis pequenos.

A concelleira de Cultura, Begoña Sanjurjo, estivo presente na cerimonia e felicitou aos gañadores, destacando a súa creatividade e esforzo. Sanjurjo tamén agradeceu ás familias e aos centros educativos polo seu traballo na promoción da poesía e a lectura, cualificando a súa implicación como fundamental para o fomento cultural.

Durante o acto, a concelleira animou aos rapaces e rapazas a seguir cultivando a súa afección por escribir e ler, subliñando que “canto máis lemos, máis ideas se nos ocorren”. Ademais, amosou o seu desexo de que, en un futuro, algún dos mozos poetas poida presentar os seus libros na mesma biblioteca que acolleu a cerimonia.

Cada un dos premiados recibiu un diploma e un lote de libros como recoñecemento ao seu traballo. Os poemas seleccionados pasarán á fase provincial, onde competirán con outros traballos da rexión.

A entrega dos premios foi unha xornada festiva para a literatura infantil, onde se resaltou a importancia de seguir fomentando a lectura e a escritura entre as novas xeracións.