Enduro, procesións, concertos e unha gran alfombra floral: arrancan as patronais en Burela
Burela celebrará, dende este venres 24 de maio e ata o 4 de xuño, as súas Festas Patronais na honra da Virxe do Carme e Xoán Bautista. Poderase gozar dunha ampla programación chea de novidades, “na que a nova Comisión de Festas se esforzou ao máximo, intentando dar o mellor para a súa vila”, asegura a alcaldesa Carmela López. O Enduro Monte Castelo Burela únese á programación para facer as festas aínda máis atractivas nesta primeira fin de semana. “Dende o Concello agardamos que estas festas sexan todo un éxito, desfrutado por igual por veciñanza e visitantes”, engade López.
Serán en total 12 días de actividades, que comezan co Día da Baixada da Vila do Medio. Ás 21.00 haberá misa e procesión dende a igrexa da Vila do Medio acompañada da Banda de Gaitas Dambara e inaugurarase o alumeado festivo. Trátase dunha iluminación decorativa especial, “na rúa Eijo Garay, pola que discorre parte da alfombra floral, para rematar nunha espectacular portada personalizada á entrada do porto”, destaca a concelleira de Festas, Patricia Eijo.
A alfombra floral lévase facendo desde hai 31 anos por parte dos veciños e veciñas de Burela, e que lucirá no transcurso da procesión do sábado que estará dedicada ao centenario da Confraría. O 25 de maio será a quenda do comezo do Enduro Monte Castelo e do tradicional Pregón, que terá lugar ás 20.00 no auditorio da Casa da Cultura. A continuación, na Praza do Concello actuará o grupo Pantera Rosa. O 26 continuará o Enduro Monte Castelo, e celebrarase o Día Infantil, cunha festa a partir das 17.00 na praza da Mariña.
Nos días seguintes haberá diversas exhibicións deportivas, concertos, karaokes e moitas actividades máis. Os días grandes comezarán o 1 de xuño co Día da Baixada ao Porto. Haberá pasacalles e concertos dende as 12.00 ata a noite, verbena e cun espectáculo pirotécnico. A misa e a procesión serán a partir das 21.00 na igrexa de Santa María.
O 2 de xuño, Día da Procesión Marítima, a misa seguida de procesión terá lugar ás 12.00, e tamén haberá pasacalles e concertos ao longo de todo o día. O 3 de xuño ás 12.00 será a procesión de subida das imaxes ata a igrexa de Santa María, seguida posteriormente de sesión vermú e verbena, e o 4 de xuño será a ofrenda floral en homenaxe ás persoas que faleceron no mar, no porto ás 12.00. “Como novidade teremos un punto violeta e un servizo de información móbil de prevención de conductas aditivas”, subliña a concelleira de Festas. Ademais, están a traballar para presentar a declaración de Festa de Interese Turístico de Galicia, de feito que se recoñeza o prestixio das patronais.