Encontro entre residentes de Trabada e Ribadeo para fomentar a interacción social
Os residentes do Centro de Maiores de Trabada da Deputación de Lugo celebraron este xoves un emotivo encontro cos usuarios e usuarias do Centro de Día A Concordia de Ribadeo. Durante a xornada, as persoas participantes tiveron a oportunidade de compartir un delicioso xantar, no que puideron estreitar lazos e afianzar a súa amizade. Ao longo da tarde, os asistentes participaron en diversas actividades de lecer que inclúen xogos, charlas e, como colofón, un animado baile que puxo fin á xornada.
Esta actividade, organizada polo organismo provincial, tivo como obxectivo principal fomentar a interacción social entre os residentes e mellorar o seu benestar, ao mesmo tempo que se promoveu o intercambio de experiencias entre os usuarios dos dous centros. Con este tipo de encontros, a Deputación de Lugo busca crear espazos de convivencia e diversión que enriquezan a vida dos maiores, favorecendo tanto o seu desenvolvemento social como emocional.