Eloi Cabanas, do BNG, leva ao pleno de Mondoñedo preguntas sobre auga, pontes e lumes
O concelleiro e voceiro do Bloque Nacionalista Galego en Mondoñedo, Eloi Cabanas Ramos, presentou para o pasado pleno de setembro unha serie de preguntas e rogos centrados en diferentes áreas de interese municipal.
Entre as cuestións máis destacadas, Cabanas pediu coñecer os avances na creación dunha Comisión de Seguimento que se comprometera a reunir en abril a Xunta de Goberno Local con diferentes institucións e empresas para abordar os problemas derivados da auga na parroquia de Santa María Maior, incluíndo o Goberno de España, a Xunta de Galicia, a Deputación de Lugo, o parque eólico de Norvento, Aguas de Galicia e Canteras Isidro Otero.
Outra das preguntas referiuse ao desvío provisional do leito do río Masma para acometer a reparación dun piar deteriorado da Ponte do Arco, sobre o cal Cabanas quixo saber se o Concello recibira os permisos necesarios e quen executaría a obra. Tamén solicitou clarificación sobre o expediente de titularidade de paso dun camiño no Barrio de Vigo, aberto en agosto de 2024, e sobre a localización e uso da motoniveladora municipal.
Entre os rogos presentados, destacou a proposta de desenvolver unha aplicación móbil para facilitar a reserva telemática dos locais municipais destinados a eventos, cursos ou charlas, similar ao sistema utilizado para pedir cita para a ITV.
Ademais, Cabanas levou ao pleno unha moción sobre a vaga de lumes forestais que afectou Galicia en agosto, defendendo medidas de prevención e unha xestión integral do medio, que finalmente foi rexeitada.
No apartado de cultura e lecer, o pleno aprobou por unanimidade as alegacións do BNG ao Mercado Medieval que propuxo en agosto, mantendo a gratuidade dos petiscos e bebidas, evitando competencia desleal coa hostalería local e rexeitando a externalización de servizos municipais, propoñendo en cambio unha maior implicación do tecido asociativo da cidade.
Segundo o voceiro nacionalista, estas medidas pretendían combinar eficiencia na xestión municipal, protección do patrimonio cultural e fomento do turismo local sen prexuízos para os negocios da cidade.