Efrén Castro recibe o premio á Mellor Xestión Deportiva concedido á Vicepresidencia da Deputación
O vicepresidente da Deputación de Lugo Efrén Castro recibiu este venres o Premio á Mellor Xestión Deportiva Pública, concedido pola Asociación Galega de Xestión Deportiva (AGAXADE).
Un galardón que recoñece, particularmente, a contribución da área de Deportes da Vicepresidencia da Deputación ao acceso ao deporte en todo o territorio, a través da descentralización na organización de eventos e ao apoio ao diverso e amplo tecido deportivo da provincia.
O vicepresidente da Deputación destacou na recollida do premio "o traballo dos clubs e do tecido deportivo da provincia, tanto de base e afeccionado como profesional, que converte Lugo nun referente por riba de territorio con maior peso demográfico ou económico. Tócanos xestionar unha etapa dourada do deporte lucense", destacou o vicepresidente que recoñeceu "o legado político de Antonio Veiga e de Antón Bao, na xestión da área de Deportes en mandatos anteriores" e o traballo do persoal do Servizo de Deportes".
Os premios – con doce categorías – fallounos un xurado integrado por representantes de AGAXADE, da FEGAMP, da Facultade de Ciencias do Deporte e Educación Física da UDC, do Cluster Galego da Industria do Deporte e o Benestar, da Asociación Galega de Xornalistas do Deporte e da Unión de Federacións Deportivas Galegas.
Ademais da Vicepresidencia da Deputación, AGAXADE recoñeceu os clubs lucenses Club Ciclista Cidade de Lugo, pola organización do Ancares Cycling Marathon, proba impulsada e patrocinada pola Vicepresidencia da Deputación desde a súa primeira edición, e ao Club Muller en Forma polo seu traballo de promoción do deporte con perspectiva de xénero.