Denuncian o déficit de persoal médico no Hospital Público da Mariña
AMariñaXa
O Concello de Viveiro advirte de que as carencias do centro de saúde trasladáronse tamén ao Hospital Público da Mariña
18 Out 2024
O Concello de Viveiro advirte de que as carencias do centro de saúde trasladáronse tamén ao Hospital Público da Mariña, poñendo en risco a saúde dos veciños e veciñas. “A sanidade pública é un servizo público esencial que está en risco en Viveiro e na Mariña”, alerta a alcaldesa, María Loureiro. A sanidade pública é "un servizo público esencial que está en perigo en Viveiro e na Mariña, pero desgrazadamente non vemos reacción por parte da Xunta”, alerta a alcaldesa. “O Hospital da Mariña sofre tamén o déficit de persoal médico que ata o de agora afectaba á atención primaria”, sostén pola súa parte Catalina Fernández, concelleira de Benestar Social, Infancia e Saúde de Viveiro.
A cobertura das urxencias é un problema xa desde hai tempo. "Agora outras especialidades tamén sofren este déficit que repercute nos veciños e veciñas da área sanitaria, con listas de espera prolongadas e tendo que ser remitidos en ocasións ao HULA”, engade. Fernández lamenta que a Xunta “traslade á poboación que os profesionais non queren vir á Mariña, porque isa non é toda a verdade, moitos profesionais vanse do hospital pola sobrecarga de traballo á que están sometidos”.
“Neste momento, a situación en varios servizos é deficitaria e instamos á Xunta a que tome medidas para fidelizar ao persoal facultativo, garantir a cobertura de todas as prazas e brindar aos usuarios a asistencia que se merecen”, remata.