Dani Vega será alcalde de Ribadeo
O PP de Daniel Vega triunfou na vila con 7 concelleiros, o Bloque Nacionalista Galego de Pablo Vizoso obtivo 5 e 1 foi para o PSOE de Marta García Rey.
O popular Dani Vega conseguiu devolver a maioría absoluta ao PP en Ribadeo tras anos de estar na oposición. Nestes comicios, o PP de Vega acadou 7 concelleiros fronte aos 5 obtidos polo BNG de Pablo Vizoso e 1 do PSOE de Marta Rey. Vega sumou 3 escanos respecto ao 2019 e o BNG e o PSOE baixaron respectivamente 2 e 1.
O futuro rexedor está estreitamente vencellado co sector agrogandeiro pois, como técnico agrícola, desenvolveu o seu labor profesional nunha cooperativa do sector lácteo realizando labores de asesoramento gandeiro.
“O meu obxectivo principal e o do meu equipo segue a ser o mesmo, poñer a Ribadeo na cima. Nestes últimos catro anos fixemos un bo traballo transmitindo confianza coas nosas actuacións e seguiremos nesa liña de ilusión, xestión e traballo.” di.
Para o candidato popular é urxente un impulso económico para o municipio co aumento da oferta de solo industrial cunha baixada do prezo, reducir os seus impostos e así impulsar o polígono para atraer máis empresas e dinamizar o comercio e a hostalería.
Vega explica tamén que é importante mellorar as vías e estradas, solucionar o tema do Hospital Asilo e ver o centro de saúde construído”.
CONCELLEIROS ELECTOS
- Daniel Vega Pérez PP
- Begoña Sanjurjo Santar PP
- Marta Saiz García PP
- Montse Seijo Díaz PP
- Diego dos Santos Rodríguez PP
- Elena Sierra Pulpeiro PP
- Francisco José Silvent Villalba PP
- Pablo Vizoso Galdo BNG
- Mónica Freire Rancaño BNG
- Vicente Castro Reigosa BNG
- Jorge Díaz Freije BNG
- Pilar Otero Cabarcos BNG
- Marta García Rey PSOE
O popular engade que “temos tamén entre as nosas prioridades converter o antigo colexio das monxas nun edificio para a Escola de Música de Ribadeo e garantir e renovar o sistema de abastecemento da auga”.
Desde o BNG de Ribadeo dixeron que asumen o papel que lles outorgou a cidadanía e “cumpriremos coa función de oposición sen defraudar. Seguiremos a traballar coa mesma ilusión de conformarmos un equipo potente que desde xa comezará a asumir o seu papel. Agora toca recoñecer a victoria do PP, tomar nota da vontade da cidadanía e analizar as causas dos resultados”.
