Comezan as tarefas de limpeza e conservación nun tramo de 13 quilómetros do río Ouro
A Consellería de Medio Ambiente e Cambio Climático, a través de Augas de Galicia, iniciou actuacións de conservación e mantemento nun tramo de preto de 13 quilómetros do río Ouro, no concello de Alfoz.
As tarefas desenvólvense na parroquia do Castro de Ouro e inclúen a retirada de árbores caídas e da biomasa acumulada no leito fluvial, co obxectivo de evitar obstrucións. O persoal encargado empregará motoserras e outras ferramentas manuais, contando tamén co apoio de maquinaria de maior tamaño, como un tractor.
Segundo informou o organismo hidráulico, xa se comunicou ao concello o inicio das obras, que se prolongarán durante unhas trece semanas. Unha vez completadas, os tramos intervidos quedarán máis despexados, favorecendo unha circulación máis fluída das augas e reducindo o risco de inundación.
Estas actuacións forman parte do programa de mantemento, conservación e mellora do dominio público hidráulico que Augas de Galicia executa nas bacías de Galicia-Costa, así como nas súas zonas de acceso e protección. Neste caso, trátase ademais de áreas catalogadas como de alto risco potencial significativo de inundación (Arpsi).
O obxectivo último é mellorar as condicións naturais do ecosistema fluvial e asegurar unha correcta xestión das augas, actuando nos treitos que son competencia da Xunta e deixando á marxe os espazos de responsabilidade municipal situados en zonas urbanas.