Comezan as obras para levar o saneamento á parroquia de Rúa, en Cervo
O Concello de Cervo vén de comezar os traballos da primeira fase do saneamento da parroquia de Rúa, que supoñen un orzamento de 338.755 euros concretamente. A rexedora, Dolores García Caramés, a concelleira de Obras, Mali Méndez, e o edil de Zona Rural, Adrián Arias, achegáronse ata a zona, acompañados do pedáneo Ramón Elemparte, e dos técnicos responsables da obra.
Supervisaron o inicio destes traballos que abranguen desde o Lugar da Granda ata o lugar do Pazo, máis dun quilómetro de rede de saneamento que dará servizo ás vivendas da zona, ao campo de fútbol e ao futuro pavillón proxectado. O orzamento inclúe a construción dunha nova depuradora nos terreos cedidos pola Comunidade de Montes. Será a sétima do termo municipal que complementará a rede de saneamento municipal formada na actualidade polas plantas depuradoras de Figueirido, A Senra, a de Cervo, a de San Ciprián, a de Trasbar e a de Castelo.