Clausurado o obradoiro de emprego O Castro X tras nove meses de formación
O obradoiro dual de emprego O Castro X, promovido polos concellos de Ribeira de Piquín, Castroverde, Pol, A Pastoriza e Riotorto, foi clausurado tras nove meses de actividade.
A directora territorial da Consellería de Emprego, Comercio e Emigración, Carmen José López, participou no acto de entrega de diplomas e destacou que a Xunta destinou 412.000 euros ao desenvolvemento desta iniciativa.
Durante este tempo, vinte persoas desempregadas tiveron a oportunidade de recibir formación teórica e práctica en especialidades como viveiros, xardíns e centros de xardinaría, operacións de acabados ríxidos e urbanización, así como control de pragas.
As actuacións realizadas permitiron rehabilitar o local social de Santa Marta de Meilán, en Riotorto, acondicionar a contorna do centro cívico de Vián, na Pastoriza, e levar a cabo tarefas de mantemento en rutas de sendeirismo como a Eo-Pena de Millares e a Chao de Pousadoiro-Muíño de García, en Ribeira de Piquín.
Ademais, melloráronse diversas zonas verdes, entre elas a carballeira da Praza Galicia e o merendeiro de Rioxán, en Pol, así como o miradoiro da Lombra e o recinto feiral de Castroverde, entre outras intervencións.