Cinema, teatro, música, humor e maxia daranse cita no Valadouro
Volve o programa Cultura na Rúa ao valadouro cargado de actuacións para as noites de verán: cinema, teatro, música, humor e maxia daranse cita na praza Santa María.
Dará comezo este sábado 17 de xullo ás 20.30 horas co concerto da asociación de acordeonistas A Mariña, e continuará o 24 co música e clown de Píscore e o seu espectáculo Con Fusión.
Xa o domingo 25 de xullo ás 20.30 horas será a quenda da obra Os novos lobos de Fantoches Baj, é un espectáculo de narración oral e monicreques no que se toca o tema do xénero desde a perspectiva das novas masculinidades. Pola noite, ás 22.30 horas, será o visionado da película Cuñados.
Por último o sábado 31 haberá un espectáculo de maxia de David Méndez ás 20.30 horas que mestura entre maxia, comedia e improvisación, e a participación do público que estará presente en todo momento.
Durante a programación do mes de xullo recoméndase a inscrición previa no 982 571 516 de 9 a 14 horas e de 15.30 a 20.00 horas, para a película de Cuñados é necesario retirar as entradas gratuítas na Casa da Cultura no mesmo horario.
