Charla en Saldoira para mellorar a seguridade das persoas maiores
O Centro Social Blanca Muruais, en Saldoira, acollerá o sábado 15 de marzo unha charla sobre prevención e seguridade dirixida ás persoas maiores. A iniciativa enmárcase no Plan Maior de Seguridade, un programa destinado a mellorar a protección deste colectivo fronte a estafas, roubos e outros riscos.
A xornada, organizada pola Asociación de Veciños San Pedro da Ribeira coa colaboración da Garda Civil, comezará ás 17:00 horas e contará con entrada gratuíta ata completar aforo. Durante o evento, ofreceranse consellos prácticos para recoñecer posibles situacións de perigo e adoptar medidas de autoprotección no día a día.
Desde a organización destacan a importancia de sensibilizar sobre este tipo de cuestións, xa que as persoas maiores son especialmente vulnerables ante determinados delitos. O obxectivo da charla é dotar aos asistentes de ferramentas útiles para incrementar a súa seguridade tanto na rúa como nos seus fogares.