Cervo revalida os seus tres sendeiros azuis
A Asociación de Educación Ambiental e do Consumidor (Adeac) comunicou que o Concello de Cervo revalida os seus tres sendeiros azuis: o Sendeiro Azul O Torno, o Sendeiro Azul Cubelas-O Rego e o Sendeiro Azul Río de Lavar-Muíño do Medio. Estes sendeiros destacan pola súa beleza natural, a súa accesibilidade e o seu coidado mantemento, converténdose nunha das referencias do municipio no ámbito do turismo sostible e o respecto polo medio ambiente.
Deste xeito, Cervo suma case 5 quilómetros de sendeiros azuis que potencian o valor natural e paisaxístico do noso municipio, situándoo como o único concello da provincia de Lugo con tres distintivos destas características. Este recoñecemento non só reflicte o compromiso do Concello coa conservación do medio natural, senón que tamén posiciona a Cervo como un destino turístico destacado para os amantes da natureza, o sendeirismo e a interpretación ambiental.
A concesión destas insignias por parte da Adeac recoñece o labor continuo de recuperación, mellora e posta en valor de sendeiros e itinerarios a nivel nacional, transformándoos en recursos únicos para a interpretación ambiental e o desfrute da natureza. Ademais, estas rutas promoven o coñecemento e a sensibilización sobre a biodiversidade local, permitindo que veciños e visitantes gocen dun contacto directo coa riqueza paisaxística e cultural da zona.
Desde o Concello de Cervo destacan que o esforzo por manter e mellorar estas infraestruturas é posible grazas á colaboración entre institucións, asociacións e veciñanza, todos eles implicados en promover un modelo de desenvolvemento sostible que combina a protección ambiental coa dinamización do turismo. O recoñecemento por parte da Adeac subliña a importancia de continuar traballando nesta liña para garantir un futuro sostible e responsable para as novas xeracións.