Cervo presenta o festival de narración oral “De Cobo a Xunco” para público infantil e adulto
O Concello de Cervo vén de dar a coñecer o Festival de Narración Oral “De Cobo a Xunco”, unha iniciativa que se desenvolverá ao longo do mes de setembro, cada venres, en diferentes parroquias e lugares do municipio. A presentación contou coa participación da alcaldesa, Dolores García Caramés, e de Carmen Conde e Diego Gallego en representación da compañía Tarabela Creativa, da que partiu a idea orixinal do festival.
O nome do evento fai referencia aos dous ríos cervenses —o Cobo e o Xunco— que percorren o concello ata desembocar no mar, simbolizando o camiño compartido das historias que unen ás persoas e á cultura local. O festival programará actuacións de destacados profesionais da narración oral galega, tanto para público infantil como adulto, e culminará cunha gala final o venres 26 de setembro no auditorio da Casa da Cultura de San Ciprián. Durante este peche, Carmen Conde será a embaixadora do Río Cobo e Caxoto a do Río Xunco; ademais, Lupe Blanco e Alba María regueifarán representando cada unha un río, e o público decidirá cos seus aplausos cal río é o gañador.
A alcaldesa Dolores García Caramés destacou que esta iniciativa pon en valor a tradición oral como ferramenta de expresión, convivencia e memoria, e animou a toda a veciñanza a participar nas diferentes sesións previstas. Ademais, agradeceu á compañía Tarabela Creativa a proposta orixinal, que recolle o espírito creativo e participativo do concello de Cervo.
A programación completa do festival inclúe actividades para público infantil baixo o nome Regato e para adultos baixo o nome Río, distribuídas nas seguintes datas e localidades:
- Venres 5 de setembro: Regato en Escolas Vellas de Cervo ás 17:00 h con Caxoto; Río no Local Social de Trasbar ás 22:00 h con Dani Blanco.
- Venres 12 de setembro: Regato en Escolas Vellas de Rúa ás 17:00 h con Brais das Hortas; Río no Local Social de Lieiro ás 20:00 h con Paula Carballeira.
- Venres 19 de setembro: Regato no Local Social da Senra ás 17:00 h con Marta Ortiz; Río nas Antigas Carboeiras de Sargadelos ás 22:00 h con Soledad Felloza.
- Venres 26 de setembro: Gala final no auditorio da Casa da Cultura ás 22:00 h con Carmen Conde, Caxoto, Lupe Blanco e Alba María.
O festival tamén inclúe un recoñecemento a un persoeiro ou persoeira da Cultura de Cervo, consolidándose como un evento de referencia para promover a tradición oral e a participación cultural no municipio.