Cervo ofrece formación gratuíta para socorristas en contornas naturais
O Concello de Cervo será o escenario dun curso gratuíto de reciclaxe en socorrismo centrado nos espazos acuáticos naturais, unha proposta formativa destinada exclusivamente a persoas xa rexistradas no Rexistro Profesional de Socorristas Acuáticos de Galicia que precisen renovar a súa inscrición.
Esta iniciativa formativa desenvolverase os días 26 e 27 de abril en horario de mañá e tarde —de 10:00 a 14:00 horas e de 16:00 a 20:00— combinando teoría e práctica nas instalacións da Casa da Cultura e na piscina municipal da localidade.
O curso está promovido pola Axencia Galega de Emerxencias (AXEGA), e a inscrición pode realizarse de xeito telemático ata o 21 de abril a través da seguinte ligazón: https://agasp.xunta.gal/gl/course/252120.
Desde o Concello destacan a importancia deste tipo de formacións para garantir a seguridade nos espazos acuáticos naturais, especialmente de cara á tempada estival. “É fundamental que os profesionais do socorrismo estean ao día e poidan actualizar os seus coñecementos para intervir con eficacia ante calquera emerxencia”, subliñan.