Cervo mellora e acondiciona as súas praias
O Concello de Cervo acomete traballos de mellora e acondicionamento do litoral enmarcados no Plan de Recuperación, Transformación e Resiliencia dos Fondos NextGenerationEU. A rexedora, Dolores García Caramés, e a edil de Medio Ambiente, Mali Méndez, achegáronse ata a praia do Torno para ver in situ a actuación que contempla a mellora dos accesos, a instalación das bases das duchas e de varios aparca bicicletas na contorna do paseo “para equipar a praia destes elementos que cada día son máis requiridos polas persoas usuarias deste recursos natural do noso municipio”.
En concreto, a actuación supón un investimento próximo aos 50.000 euros – 48.312,87 euros exactamente- e permitirá dotar a esta zona tan frecuentada durante o verán de mellores infraestruturas e equipamentos adaptados e integrados co medio que tamén contribuirán a mellorar a estética e a accesibilidade e farán máis confortable a estancia nas nosas praias nestes meses de verán, apuntou a rexedora.