Cervo estrea un novo sistema de calefacción na Casa do Mar tras unha reforma enerxética de case 90.000 euros
O Concello de Cervo vén de poñer en funcionamento o novo sistema de calefacción da Casa do Mar, unha actuación que coincide coa baixada das temperaturas e que supón un paso adiante na modernización deste inmoble de uso social. A intervención, cun investimento total de 89.746,68 euros, contou cunha axuda do 50% procedente da Xunta de Galicia a través do Instituto Enerxético de Galicia (INEGA), no marco do Plan de Recuperación, Transformación e Resiliencia, financiado pola Unión Europea cos fondos NextGenerationEU.
Os traballos centraronse na retirada da antiga caldeira de gasóleo, instalada en 1990, e na súa substitución por dúas caldeiras de biomasa en tándem, alimentadas con pellets. Instaláronse tamén silos de almacenaxe, ademais de acometer unha renovación integral da sala de máquinas, incorporando sistemas de ventilación e regulación máis eficientes, circuladoras de baixo consumo, contadores enerxéticos e medidas de seguridade contra incendios, adaptadas ás esixencias do RITE 2019 e do Código Técnico da Edificación.
A alcaldesa, Dolores García Caramés, acompañada pola concelleira Mali Méndez, visitou o edificio para comprobar o funcionamento do novo servizo. Alí destacou que esta actuación “é un avance moi importante para mellorar as instalacións da Casa do Mar, reducir consumos e apostar por unha enerxía renovable, sostible e máis respectuosa co medio ambiente”.
Durante o percorrido, García Caramés mantivo unha conversa cos membros da asociación Terra Mar, que empregan a diario este espazo como local social. Compartiron as primeiras impresións do novo sistema, subliñando “a relevancia de que estas melloras repercutan no confort e na calidade dos servizos que se ofrecen tanto ás persoas usuarias como ás entidades que dan vida ao edificio”.
A rexedora lembrou ademais que a Casa do Mar “é un punto esencial para a vida social de Cervo”, pois nela se atopan a escola infantil, diversas actividades deportivas e culturais, e programas como Arruguiñas ou Cervo Concilia, ademais de ser sede de distintas asociacións. “Con esta instalación renovada garantimos un servizo máis eficiente e un ambiente máis agradable para todas as persoas usuarias”, concluíu.
Con este proxecto, o Concello de Cervo continúa a súa liña de actuación en favor da eficiencia enerxética e da sostibilidade, modernizando un edificio municipal clave e reducindo de maneira significativa a súa pegada ambiental.