Cervo clausura o obradoiro de emprego compartido con Burela e Xove
O Concello de Cervo acolleu o acto de clausura do Obradoiro de Emprego “Senda de Burela, Cervo e Xove XI”, no que participaron vinte alumnos e alumnas —sete de Cervo, seis de Xove e sete de Burela—.
O encontro contou coa presenza da alcaldesa, Dolores García Caramés, acompañada pola edil de Medio Ambiente, Mali Méndez; a directora territorial de Emprego da Xunta en Lugo, Carmen José López; os tenentes de alcalde de Xove e Burela, Dolores Meitín e Mario Pillado; ademais do director, equipo administrativo, monitores e alumnado do programa.
Durante a súa intervención, García Caramés subliñou que “é un auténtico pracer para o noso municipio poder organizar de novo este obradoiro compartido, que serviu para mellorar a formación en xardinería do alumnado e, ao mesmo tempo, para levar a cabo actuacións de interese xeral en Cervo, Burela e Xove”.
A rexedora salientou que a xardinería é unha profesión cun alto índice de inserción laboral e animou aos participantes a aproveitar a formación recibida para avanzar nos seus proxectos profesionais.
En Cervo, os traballos realizados durante os nove meses de duración do obradoiro centráranse na mellora e mantemento de zonas verdes, poda, plantacións de tempada e no acondicionamento da senda botánica de Sargadelos, así como da contorna do Museo do Mar e do parque Reina Sofía, entre outros espazos que agora amosan unha imaxe renovada.
“Estes obradoiros son unha oportunidade única de colaboración institucional, que melloran a empregabilidade e repercuten directamente na calidade de vida da veciñanza”, apuntou a alcaldesa, quen agradeceu o labor de todo o equipo e, de maneira especial, do alumnado: “Noraboa polo traballo destes meses, o esforzo que fixestes vese claramente nos espazos públicos”.
Para concluír, García Caramés avanzou que o Concello de Cervo seguirá apostando por este tipo de iniciativas formativas en colaboración coa Xunta de Galicia, dado o seu impacto positivo tanto no ámbito laboral como no social.