Cervo celebra o XVIII Encontro de Palilleiras para manter viva a súa tradición artesanal
O Concello de Cervo acollerá o sábado 5 de abril o XVIII Encontro de Palilleiras e Feira de Artesanía, que terá lugar na carpa instalada na Praza dos Campos, en San Cibrao.
Con dezaoito anos de traxectoria, este evento consolidouse como unha das citas máis destacadas do municipio, cun claro obxectivo: poñer en valor e dar visibilidade a unha arte tradicional que forma parte do patrimonio cultural da zona.
A alcaldesa destacou a relevancia de manter viva esta tradición e enxalzou o traballo das palilleiras, auténticas gardiás dun oficio transmitido de xeración en xeración. “O encontro é unha oportunidade para recoñecer a súa paciencia, dedicación e creatividade, ademais de permitir que o público poida contemplar en directo a súa mestría artesanal”, sinalou.
Desde o Concello animan a toda a veciñanza a participar nesta xornada especial. As inscricións xa están abertas e poden realizarse na Casa da Cultura, a través dos teléfonos 982 59 51 57 ou 629 91 22 39.